গুৱাহাটী,২৮ ফেব্ৰুৱাৰী : জলবায়ু পৰিৱৰ্তন হৈছে বিশ্বজুৰি ক্ৰমাৎ বৃদ্ধি পোৱা বিশ্ব সংকট। জলবায়ু পৰিৱৰ্তন বিষয়টোক কেন্দ্ৰ কৰি সজাগতা বৃদ্ধি আৰু ৰাজহুৱা সজাগতা গঢ় দিয়াত সাংবাদিকসকলে গুৰুত্বপূৰ্ণ ভূমিকা পালন কৰে। জলবায়ু পৰিৱৰ্তনৰ প্ৰভাৱৰ বিষয়ে ক্ৰমাৎ উদ্বেগ বৃদ্ধি পোৱাৰ উদ্দেশ্য আগত ৰাখি শুকুৰবাৰে গুৱাহাটী বিশ্ববিদ্যালয়ত ‘জলবায়ু পৰিৱৰ্তন আৰু সংবাদ মাধ্যমৰ ভূমিকা ’শীৰ্ষক অনুষ্ঠানত বিভিন্ন সংবাদ সংস্থাৰ ৪০ জনতকৈ অধিক সম্পাদকে জলবায়ু পৰিবৰ্তন আৰু দুৰ্যোগৰ বাবে প্ৰস্তুতিৰ পোষকতা কৰি সংবাদ মাধ্যমৰ শক্তিৰ বিষয়ে আলোচনা কৰে। বিশ্ববিদ্যালয়খনৰ যোগাযোগ আৰু সাংবাদিকতা বিভাগে পৰিৱেশ বিজ্ঞান বিভাগৰ সহযোগত আৰু অসম ৰাজ্যিক দুৰ্যোগ ব্যৱস্থাপনা প্ৰাধিকৰণ ( এ এছ ডি এম এ ) ৰ সহযোগত আয়োজন কৰা এই অনুষ্ঠানত জলবায়ু পৰিবৰ্তন আৰু দুৰ্যোগৰ সময়ত প্ৰস্তুতিৰ পোষকতাত সংবাদ মাধ্যমৰ জটিল ভূমিকা অন্বেষণ কৰি এক গভীৰ আলোচনা হয়। বিশ্ববিদ্যালয় সংগীতেৰে আৰম্ভ হোৱা উক্ত অনুষ্ঠানটোত মুখ্য অতিথি হিচাপে উপস্থিত থাকি বিশ্ববিদ্যালয়ৰ উপাচাৰ্য অধ্যাপক ড⁰ ননী গোপাল মহন্তই পৰিৱেশ বিষয়ত ৰাজহুৱা সজাগতা গঢ় দিয়াত সংবাদ মাধ্যমৰ গুৰুত্বৰ ওপৰত ভাষণ প্ৰদান কৰে। তেওঁ উল্লেখ কৰে যে “সাংবাদিকসকল হৈছে বিজ্ঞান আৰু সমাজৰ সমন্বয়ৰ মাধ্যম। জলবায়ু পৰিবৰ্তনৰ বাস্তৱতাক জনসাধাৰণৰ মাজত আনিবলৈ তেঁওলোকে নিজৰ ক্ষমতাৰে সম্পূৰ্ণভাৱে চেষ্টা কৰিব লাগে।" উপাচাৰ্যগৰাকীয়ে সচেতনতা আৰু নীতি পৰিৱৰ্তনৰ ক্ষেত্ৰত সংবাদ মাধ্যমৰ দায়িত্বৰ ওপৰত আলোকপাত কৰে। জলবায়ু পৰিৱৰ্তন আৰু দুৰ্যোগৰ সময়ত যোগাযোগৰ ক্ষেত্ৰত প্ৰত্যাহ্বানসমূহ অন্বেষণ কৰা, ফলপ্ৰসূ সংবাদ মাধ্যমৰ কৌশল প্ৰস্তুত কৰা, আৰু প্ৰাথমিক পৰ্যায়ৰ যোগাযোগৰ নিৰ্দেশনা প্ৰণয়ন কৰা তথা বৈঠকৰ প্ৰাথমিক লক্ষ্যসমূহৰ ওপৰতো অসম ৰাজ্যিক দুৰ্যোগ ব্যৱস্থাপনা প্ৰাধিকৰণ (এ এছ ডি এম এ )ৰ সম্পাদিকা আৰু অতিৰিক্ত মুখ্য কাৰ্যবাহী বিষয়া মীনাক্ষী দাস নাথে মূলভাষণ প্ৰদান কৰে। বৈঠকত সম্পাদকসকলে তেওঁলোকৰ সংস্থাসমূহে এই বিষয়ৰ ওপৰত কেনেদৰে কাম কৰি আহিছে সেই বিষয়ে নিজৰ মত প্ৰকাশ কৰে। অনুষ্ঠানত আদৰণি ভাষণ প্ৰদান কৰি যোগাযোগ আৰু সাংবাদিকতা বিভাগৰ মুৰব্বী অধ্যাপক ড⁰ চন্দন কুমাৰ গোস্বামীয়ে উল্লেখ কৰে যে সংবাদ মাধ্যম কেৱল বাৰ্তাবাহক নহয়, ই পৰিৱৰ্তনৰ এক মাধ্যম। অনুষ্ঠানৰ সমন্বয়ক ড⁰ ভাৰতী ভৰালীয়ে জলবায়ু পৰিৱৰ্তনৰ দৰে সংবেদনশীল বিষয়ৰ ক্ষেত্ৰত কিদৰে জনসাধাৰণৰ মাজত সজাগতা আনিব পাৰি সেই বিষয়ে বিশ্ববিদ্যালয়ৰ সহযোগত তথা যোগাযোগ আৰু সাংবাদিকতা বিভাগৰ জৰিয়তে প্ৰশিক্ষণৰ ব্যৱস্থা কৰা হব বুলি বক্তব্য আগবঢ়ায়। তেওঁ অনুষ্ঠানত উপস্থিত সন্মানীয় উপাচাৰ্য, অধ্যাপক, গৱেষক শিক্ষাৰ্থী তথা সমূহ ছাত্ৰ ছাত্ৰীক সক্ৰিয় অংশগ্ৰহণৰ বাবে ধন্যবাদ জ্ঞাপন কৰে ।
0 Comments:
Post a Comment